Udine's Banshees show their love for derby in three languages!

O sin contents di ospitâ chest post des Banshees Roller Derby Udine . Par mantignî il spirt dal lôr progjet, chest post al è disponibil par inglês, talian e furlan [o podês sielzi la lenghe tal menù che al è a çampe de imagjin]


Flyer for #whyIchooserollerderby project, image of Banshees on track, overlaid with hashtag and instagram icons.

Mandi a dutis e a ducj,

o soi Sugar Molotov (Molotov di Zucar) des Banshees – Roller Derby di Udin. O sin une scuadre zovine dal Nord Est de Italie che e cîr di meti adun un roster complet, come che prime di nô tantis altris scuadris a àn fat o a son daûr a fâlu in chest moment in dut il mont. O vin dutis/ducj sperimentât il classic: “roller ce…?” de int, cussì une dì o ai pensât: “Parcè isal cussì dificil spiegâ trop ecitant che al è chest sport? Cemût puedio fâur viodi e sintî ce che o ai viodût jo intal roller derby e cemût che mi fâs sintî ancje vuê?”

Alore o vin decidût di creâ un piçul spazi personâl sui nestris account social (Facebook e Instagram) dedicât a ogni skater, ref, nso o sostenidore/sostenidôr par fâur contâ ce che lôr a amin dal roller derby e parcè che ogni dì a tornin a sielzi di praticâ chest sport straordenari, emozionant ma ancje costôs e pericolôs. O sin personis diferentis ma chest sport nus lee intune maniere uniche, almancul pe mê esperience. E cussì e je nassude la campagne #whyIchooserollerderby; clâr che no vin tancj followers come altris scuadris plui grandis, ma o volevin provâ istès! Cun di plui, il spazi al è un concet une vore impuartant tal roller derby, duncje no vin metût nissun limit: o ai domandât aes mês compagnis e compagns di scuadre di partecipâ a chest progjet sielzint une foto e scrivint dut ce che i plaseve su chest teme. O volevi che si sintissin ben intal condividi ce che si sintivin di condividi. Intant che il progjet al cjapave forme, o ai pensât che al sarès stât biel se ancje altris personis a vessin partecipât, duncje us domandi daurman se o vês plasê di zontâsi ancje voaltris. No vin tant ce dâ in cambi, fale che la sigurece che o fasarìn tesaur di ogni contribût come se al fos nestri.

Ogni test al ven voltât in trê lenghis: talian, la nestre lenghe mari, inglês, parcè che o volìn che il numar plui alt pussibil di personis al leiedi, e il furlan, parcè che e je la lenghe fevelade in Friûl, cheste regjon de Italie e o volìn cjapâ part al sfuarç par tignîle in vite. E fâs part ancje jê de nestre identitât. Une nestre compagne di scuadre e à voltât il so contribût par spagnûl, parcè che al fâs part des sôs origjins, e lu vin amât une vore.

Duncje!

O speri di vêus dade une reson par zontâsi a chest nestri piçul progjet, cu la sperance che al rivi a sparniçâ la gnove che achì al è un mont gnûf pardabon unic. Ca o cjatais i riferiments des nestris pagjinis: la campagne e je za tacade, e o podês viodi cemût che si à disvilupade!

https://www.facebook.com/bansheesrollerderby/ https://www.instagram.com/bansheesrollerderby/

Graciis par vênus dedicât un tic dal vuestri timp

Sugar Molotov

Banshees Roller Derby Udine

Mosaic image showing all of the profile pictures of contributors to the project, in grayscale, with central hue-based tone mapping from the Banshees logo.

Nota: o ai scrite cheste letare cuant che la campagne e jere tacade di pôc; e je cressude biel planc ma in maniere costante e o ai voie di dî graciis a dutis lis personis che nus àn judadis par lâ indevant in chest progjet: Enrico Comar e Maria Devincenti che a àn voltât cualchi test par furlan, Enrico Gigante che al à tradusût la plui part dai tescj, e che no podarìn mai ringraciâ avonde. Simpri pront e une vore svelt! O ringracii l’ARLeF, Agjenzie Regjonâl pe Lenghe Furlane e Francesca Battistutta dal Sportel Regjonâl pe lenghe furlane par dutis lis revisions dal furlan. Jê nus à ancje judadis une vore cun chest articul e e je une vore preziose par me pal sô caratar solâr e pe sô anime furlane braurose. Dutis lis grafichis a son stadis realizadis di Giulia Malaridotti (Woozy McWolf), la nestre passionade di cjans cence sium, buine di mandâmi lis fotografiis editadis ancje aes 3 di buinore cussì che o podedi publicâlis par timp. I tescj par inglês a son stâts revisionâts di Chealsey Lynch (Marma Juke), la nestre blocker americane, che e sarà une Banshees par simpri intai nestris cûrs – tu nus mancjarâs une vore. Menzon speciâl pes mês compagnis matis SMMs: Alessandra Menardi (Jackass Menny), Sveva Angelini (Freaky Pinball) e Alessandra Piermattei (Alycat), che a àn crodût ta chest progjet cuant che nancje jo i crodevi e che mi àn simpri parât il daûr cuant che no rivavi plui a curâ il mont virtuâl. Fantatis, o sês lis miors. No sarès mai rivade a fâ dut cence di voaltris. Ultimis, ma che no son mancul impuartantis, dutis lis Banshees, che a àn contentât chest gno estri, e dutis lis personis, skater e officials, che a àn cjapât part a chest progjet e che nus àn mandât i tocs plui personâi su lis lôr derby storiis e che nus àn fatis vaî. Graciis.

#rollerderby #whyIchooserollerderby #quadskates #derbylife #rollerskating #rollerskate #roller #skate #derby #rollerskates #skating #flattrackrollerderby #derbylove #derbygirls #derbyguys #derbyfamily #supportyourlocalteam #bansheesudine #bansheetudine #friuliveneziagiulia #fvg #jointhebanshees #friulano #lenghefurlane #ARLeF #scottishrollerderby